去書店

心血來潮決定用廣東話寫呢篇文，請多加留意。

上個禮拜下晝決定去屋企附近嘅大眾書店（Popular Bookstore）尞liu4¹。

行到入邊，睇到書店整體嘅結構重係同我細嗰陣尞 Popular 嘅時候差唔多，變化唔大。入邊賣嘅書亦都係同以前噉樣多樣。反而係入邊嘅裝修係行全黑色嘅風格，同我之前去過嘅其他大眾書店嘅白色裝潢截然不同。

我不假思索嘅行去華語漫畫同小説區，睇下而家佢哋到賣乜書。

過程中，我唔單止睇到好多之前聽都未聽過嘅漫畫系列，仲睇到一啲我小學嗰陣睇過嘅本地漫畫系列。其中值得一提嘅係糖果工房嘅「糖果系列」，估唔到過咗十幾年呢個系列重有出新書（已經出到第 69 本啦！），而且入邊嘅故事人物竟然都長大咗²，真係令我呢個老（？）讀者感到好安慰（？）啊～

然之後再尞下尞下，有一本書引起咗我嘅興趣：由馬來西亞青少年華文讀物出版社——紅蜻蜓出版社旗下作者合著嘅《暗號 100 專案，腦洞爭相上演》。呢本書係一本短篇小説集，入邊嘅故事題材多樣，有科幻、冒險、校園青春等等。噉樣嘅編排方式比較適合我呢種想要接觸唔同類型風格嘅故事但又無時間讀單一長～篇內容嘅人。

有趣嘅係，呢本書係為咗慶祝大眾書局成立 100 週年而特別製作嘅，可見大眾書局對馬來西亞出版市場——尤其係華語出版市場——嘅重要意義。更有趣嘅係，呢個並非當地出版社特別為大眾書局出書嘅唯一例子：2014 年，漫畫出版社 Gempak Starz 亦都曾經為咗慶祝大眾書局成立 90 週年出過一本叫做《與你相伴 90 年》嘅短篇漫畫合集。

（特別聲明一下：我唔係特登幫大眾書局打廣告，會揀到呢本書凈係啱好啫。）

但係我因為想愛用現金買呢本書但係冇帶夠鐳leoi1，所以我當時無即刻買嗰本書。點知後尾再去同一家店睇，發現佢被買走咗 😭！無辦法啦，只好另外上網訂啦。

尞咗書店一輪後，真係覺得好彩自己無選擇一成日攌waan6喺屋企入邊睇電話，以浪費生命嘅方式逃避外部世界嘅殘酷。

有時候，就算呢個世界令我有幾失望都好，至少一本好書——一本由真人一筆一畫、一點一滴寫成嘅書——重係會俾我心靈上嘅慰藉。呢一點係再高科技嘅社群媒體，或者係生成式 AI，都取代唔到嘅。